Rreth 24 ton misër i importuar nga Greqia, i destinuar për ushqim kafshësh, është bllokuar në pikën kufitare të Qafë Botës në Sarandë, pas kontrolleve të kryera nga Autoriteti Kombëtar i Ushqimit. Analizat kanë treguar praninë e një niveli të lartë të aflatoksinës B1, ndërsa AKU ka bllokuar të gjithë sasinë e misrit dhe ka nisur procedurat për asgjësimin e saj. Subjekti importues nuk do të lejohet të vijojë aktivitetin për këtë ngarkesë deri në përfundimin e plotë të procesit të verifikimit dhe asgjësimit të misrit të kontaminuar.
Pak ditë më parë, edhe në Shkodër u konstatua një sasi misri me aflatoksinë, që kishte hyrë nga Serbia përmes pikës së Hanit të Hotit.
“Në vijim të verifikimeve është konstatuar se subjekti ka administruar rreth 104 ton misër rifuxho, të importuara në periudhën nëntor–dhjetor 2025; kjo sasi është gjetur e përzier dhe pa identifikim lote (pa gjurmueshmëri); në momentin e verifikimit fizik nga trupa inspektuese, më datë 4 mars 2026, janë konstatuar vetëm 9.5 ton në gjendje, duke krijuar dyshime për lëvizje të paligjshme të produktit.”, Dashnor Sula, inspektor i përgjithshëm.
Misri ishte për përdorim në pulari, por kryeinspektori Dashnor Sula shpjegoi se nuk ka rrezik për konsumatorët.
“Bazuar në të dhënat aktuale, rasti lidhet me ushqimin për kafshë (misër rifuxho) dhe jo drejtpërdrejt me produktin final (vezët). Nga analizat laboratorike të kryera më datë 26.02.2026 (raportet nr. 19.40-26 dhe 21.44-26), rezultoi prani e aflatoksinës B1 mbi normë në ushqimin për kafshë. Deri më tani: nuk ka evidencë shkencore të konfirmuar për transmetimin e aflatoksinës B1 te veza, ndryshe nga aflatoksina M1 në qumësht; megjithatë, rasti është trajtuar me parimin e kujdesit maksimal (precautionary principle). Për këtë arsye: produkti është konsideruar i pasigurt për përdorim; janë marrë masa të menjëhershme administrative dhe penale.”
Për rastin kanë nisur hetimet edhe nga Prokuroria e Shkodrës. Inspektorati i Përgjithshëm njoftoi se sasia e gjetur me misër do të asgjësohet, ndërsa subjekti importues është gjobitur. Po ashtu, janë dërguar për verifikim disiplinor 10 inspektorë, të cilët dyshohen se nuk kanë kryer detyrën siç duhet.
/vizionplus.tv
