Shqiptarët kërkojnë ndryshimin, sipas liderit të PD, Lulzim Basha. Dhe ky ndryshim, shtoi ai, mund të vijë vetëm nga opozita.
Këtë të hënë Basha zhvilloi takime me qytetarët në Vorë, Kamzë e Marikaj, ku deklaroi se nisja e ndryshimit do të jetë 25 prilli. Kryedemokrati premtoi edhe futjen e Shqipërisë në BE.
“Sot në Vorë, Kamzë e Marikaj çdo qytetar që takova më konfirmoi se Shqipëria kërkon ndryshim, sepse Shqipëria ka nevojë urgjente për ndryshim. Nga çdo qytetar që takova dëgjova të njëjtën bindje: pas 8 vitesh me Ramën, vendi nuk mund të vazhdojë kështu. Të njëjtën bindje se ne duhet të ndryshojmë dhe koha është tani. Në Vorë, në Kamzë, në çdo shtëpi që hyra, në çdo rrugë që kalova mora mesazhin e qartë se janë pikërisht qytetarët ata që do ta sjellin ndryshimin me votën e tyre më 25 prill. Prandaj ne jemi bashkuar për ta sjellë këtë ndryshim dhe për të nisur punën për qytetarët shqiptarë dhe për ta futur Shqipërinë në Bashkimin Europian. Më 25 prill, të gjithë së bashku do të sjellim ndryshimin dhe Shqipëria do të fitojë!
