Kryetari në detyrë i Partisë Demokratike, Lulzim Basha përcolli një mesazh me rastin e 22-vjetorit të çlirimit të Kosovës.
Kryedemokrati përkujtoi ata që kanë dhënë jetën për liri dhe u shpreh se e ardhmja e Kosovës do të ndërtohet me ndihmën e partnerëve ndërkombëtarë.
“Në këtë ditë krenarie kombëtare, mirënjohja më e thellë shkon për bijtë dhe bijat e Kosovës që dhanë jetën për liri, për lidershipin e Presidentit historik, Ibrahim Rugova, për luftën heroike të Ushtrisë Çlirimtare të Kosovës dhe simbolit të saj, Komandantit Legjendar, Adem Jashari. Në këtë rrugëtim plot sakrifica dhe shpresë drejt ëndrrës së çlirimit, shqiptarët do t’u jenë përjetë mirënjohës aleatëve tanë strategjikë, vendeve anëtare të NATO-s të udhëhequr nga SHBA, e të gjithë partnerëve. Liria dhe shteti i Kosovës janë kontribut i përbashkët i shqiptarëve dhe partnerëve të saj. E ardhmja e Kosovës, si një shtet i fortë, demokratik, anëtar i NATO-s dhe BE-së, do ndërtohet bashkarisht me partnerët dhe aleatët tanë 🇦🇱🇽🇰”, tha Lulzim Basha në rrjetet sociale.
