Pas mbledhjes së grupi parlamentar të PS, Taulant Balla ka sqaruar vendimet për çështjen e komisioneve hetimore.
Balla deklaroi se komisioni hetimor “Becchetti” do të shtyhet, me pretendimin se Shqipëria duhet të vazhdojë të mbrojë interesat e saj. Ky sugjerim, sipas tij, ka ardhur nga avokati i shtetit.
Aio shtoi se ky komision mund të ngrihet në një moment të dytë, kur Shqipëria të ketë ecur në procesin juridik dhe ligjor për këtë çështje.
“Njëra prej kërkesave të PD natyrshëm bie në kundërshtim me vendimin e Gjykatës Kushtetuese që ka sqaruar qasjet, pakica ka të drejtë të ngrihet një komision hetimor dhe nuk vihet në dyshim ngritja e një komisioni hetimor, por kur kërkesa bie në kundërshtim me Kushtetutën, mendoj që bie në kundërshtim me interesat e Shqipërisë në raport me disa procese gjyqësore që po zhvillon Shqipëria. Interesi më i madh që duhet të prevalojë është interesi i Shqipërisë. Shqipëria duhet të vazhdojë të mbrojë interesat e saj dhe ky ka qenë sugjerim dhe i avokatit të shtetit, i cili kërkon që kjo çështje të shtyhet dhe sapo Shqipëria të ketë ecur në procesin juridik, ligjor për këtë çështje ne mund ta ngremë këtë komision në një moment të dytë. Unë do të mbaj qëndrimin e plotë të maxhorancës në seancë plenare në lidhje me këtë çështje. Insistimi i Kuvendit të Shqipërisë i cili është sa i të majtës dhe i së djathtës mund të vinte në rrezik ecurinë e procesit. Ka qenë konfidencial i kërkuar nga të dy palët”, tha Balla.
