Një avion njëmotorësh u rrëzua gjatë një uljeje të detyruar pasditen e së premtes (12 dhjetor) në rrugën Neckarauer Straße, në qytetin Mannheim. Sipas gazetës Mannheimer Morgen, gjatë uljes së detyruar, avioni kaloi mes dy automjeteve të parkuara dhe u ndal në mes të rrugës, duke pësuar dëme të mëdha materiale.
Në bord ndodheshin tre persona, dy burra dhe një grua. Piloti 23-vjeçar u plagos rëndë, ndërsa dy pasagjerët e tjerë, një 37-vjeçar dhe partnerja 23-vjeçare e pilotit, pësuan lëndime të lehta. Të tre arritën të dilnin vetë nga avioni dhe u transportuan në spitale të zonës.
Pamjet e publikuara në rrjetet sociale tregojnë se avioni është shkatërruar pothuajse plotësisht. Në vendngjarje mbërritën forca të shumta të zjarrfikëses, policisë dhe ekipeve të shpëtimit për të siguruar zonën.
Sipas policisë, po hetohet mundësia që një defekt në motor të ketë shkaktuar uljen e detyruar. Dëmet në avion vlerësohen rreth 400 mijë euro, ndërsa mjeti fluturues është tërhequr nga vendi i aksidentit.
/vizionplus.tv
