E mërkura ishte mbrëmja e shqiptarëve në kompeticionet europiane të klubeve. Në Champions Lige, në duelin e transmetuar në Tring Sparta e Pragës-Inter, patëm një përballje interesante në fushën e lojës mes dy lojtarëve që tek kombëtarja jonë janë jo vetëm shokë skuadre, por edhe titullarë .
Qazim Laçi luajti gjithë kohën si titullar dhe bëri një paraqitje pozitive përballë një skuadre më cilësore sikurse Inter. Ndërsa Kristjan Asllani luajti 71 minuta, edhe ai i vlerësuar me notë të mirë veçanërisht për shërbimet e sakta, gati 97%. Dueli mes kuqezinjve u ndoq nga afër në stadium edhe nga stafi teknik i kombëtares me në krye trajnerin Silvinjo.
Mbrëmje e jashtëzakonshëm në Europa Lige ndërkohë për dyshen e shqiptarëve Ernest Muçi dhe Milot Rashica. Beshiktashi mori një fitore të madhe 4 me 1 kundër Bilbaos që e riktheu në lojë për kualifikimin në fazën tjetër. Protagonist në këtë sukses ishin edhe dy futbollistët shqiptarë të fazës ofensive. Rashica shënoi dy prej golave, ndërsa Muçi ishte në një formë shumë të mirë duke inspiruar veçanërisht golin e dytë të Rashicës në minutën e 60.
Fantazisti i kombëtares kuqezi u largua nga fusha vetëm në minutën e 87. Ardhja në stol tek Beshiktash e trajnerit norvegjez Solskjaer, ka ndryshuar situatën në favor të Muçit pasi ai po merr më shumë besim dhe po shprehet po kaq mirë në fushën e lojës.
