Zyrtarët nga Kanadaja, Meksika dhe Kina kanë paralajmëruar se zotimi i Presidentit të zgjehdur të SHBA, Donald Trump, për të vendosur tarifa ndaj tre partnerëve më të mëdhenj tregtarë të Amerikës, mund të përmbysin ekonomitë e të katër vendeve.
“Një tarifë do të pasojë një tjetër si përgjigje dhe kështu me radhë, derisa të rrezikojmë bizneset tona të përbashkëta,” tha presidentja e Meksikës Claudia Sheinbaum.
Lexo edhe :
Related Posts
Trump u zotua të hënën në mbrëmje të vendosë tarifa 25% për mallrat që vijnë nga Meksika dhe Kanadaja dhe një shtesë prej 10% për mallrat që vijnë nga Kina. Ai tha se tarifat ishin një përpjekje për të frenuar drogën dhe imigracionin e paligjshëm.
Kryeministri i Kanadasë Justin Trudeau tha se ai foli me Trump në orët pas njoftimit dhe planifikoi të mbante një takim me krerët provincialë të Kanadasë të mërkurën për të diskutuar një përgjigje.
Një zëdhënës i ambasadës së Kinës në Uashington DC tha për BBC: “Askush nuk do të fitojë një luftë tregtare apo një luftë tarifash”.
Kundërshtimi ndërkombëtar erdhi një ditë pasi Trump njoftoi planet e tij për ditën e tij të parë në detyrë, më 20 janar, në një postim në uebsajtin e tij të mediave sociale, Truth Social.
Trudeau tha se vendi i tij ishte i përgatitur të punonte me SHBA-në në “mënyra konstruktive”.
“Kjo është një marrëdhënie për të cilën ne e dimë se kërkon një punë të caktuar dhe kjo është ajo që ne do të bëjmë,” u tha Trudeau gazetarëve.
Në një telefonatë me Trump, Trudeau tha se dyshja diskutuan tregtinë dhe sigurinë kufitare, me kryeministrin duke theksuar se numri i emigrantëve që kalonin kufirin kanadez ishte shumë më i vogël krahasuar me kufirin SHBA-Meksikë.
Ekipi i Trump refuzoi të konfirmonte thirrjen telefonike.
Por zëdhënësi i Trump Steven Cheung shtoi se liderët botërorë kishin kërkuar të “zhvillojnë marrëdhënie më të forta” me Trump “sepse ai përfaqëson paqen dhe stabilitetin global”.
Presidenti i Meksikës, Sheinbaum u tha gazetarëve të martën se as kërcënimet dhe as tarifat nuk do të zgjidhin “fenomenin e migrimit” ose konsumin e drogës në SHBA.
Sheinbaum paralajmëroi gjithashtu se Meksika do të hakmerrej duke vendosur taksat e veta mbi importet amerikane, të cilat do të “vinin në rrezik ndërmarrjet e zakonshme”.
Ajo tha se Meksika kishte marrë hapa për të trajtuar migrimin e paligjshëm në SHBA dhe se “karvanët e emigrantëve nuk arrijnë më në kufi”.
Çështja e drogës, shtoi ajo, “është një problem i shëndetit publik dhe konsumit në shoqërinë e vendit tuaj”.
Ndërkohë, një zëdhënës i ambasadës së Kinës në Uashington, Liu Pengyu, tha për BBC se “bashkëpunimi ekonomik dhe tregtar Kinë-SHBA është reciprokisht i dobishëm në natyrë”.
Ai mohoi që Kina lejon që kimikatet e përdorura në prodhimin e drogave të paligjshme, përfshirë fentanyl, të kontrabandohen në SHBA.
“Kina i është përgjigjur kërkesës së SHBA-së për verifikimin e të dhënave për raste të caktuara dhe ka ndërmarrë veprime”, tha Liu.
Presidenti Joe Biden ka lënë në fuqi tarifat ndaj Kinës që Trump vendosi në mandatin e tij të parë dhe shtoi disa të tjera të tijat.
Aktualisht, shumica e atyre që të dy vendet i shesin njëri-tjetrit i nënshtrohen tarifave, 66.4% e importeve amerikane nga Kina dhe 58.3% e importeve kineze nga SHBA.
Duke folur në Dhomën e Komunave në Otava, Trudeau u tha ligjvënësve se “ideja për të shkuar në luftë me Shtetet e Bashkuara nuk është ajo që dëshiron askush”.
Ai u bëri thirrje atyre që të mos bëjnë “panik”, dhe të punojnë së bashku.
“Kjo është puna që ne do të bëjmë seriozisht, metodikisht. Por pa u trembur,” tha ai./vizionplus.tv
