Policia e qarkut Shkodër vijon me intensitet operacionin antikanabis të koduar “Koordinata”, në kuadër të goditjes së kultivimit të bimëve narkotike në zonat rurale dhe të thella të qarkut.
Gjatë kontrolleve të kryera në territor, shërbimet e Drejtorisë Vendore të Policisë Shkodër, në bashkëpunim me komisariatet përkatëse, kanë zbuluar dhe asgjësuar 8028 bimë të dyshuara narkotike të llojit cannabis sativa.
Në njësitë administrative Pult dhe Shosh, janë gjetur dhe asgjësuar 7073 bimë narkotike, ndërsa në vijim të hetimeve janë proceduar penalisht 5 kryetarë fshatrash, të dyshuar për “Shpërdorim detyre” dhe “Moskallëzim krimi”. Konkretisht janë proceduar në gjendje të lirë:
N. V., kryetar i fshatit Ndrejaj
P. S., kryetar i fshatit Lekaj
V. V., kryetar i fshatit Nicaj
N. Sh., kryetar i fshatit Plan
P. H., kryetar i fshatit Kir (i proceduar për “Shpërdorim detyre” dhe “Moskallëzim krimi”)
Ndërkohë, në territorin e njësisë administrative Kelmend, shërbimet e Komisariatit të Policisë Malësi e Madhe gjetën dhe asgjësuan 780 bimë kanabisi, ndërsa në Temal, Komisariati i Policisë Vau i Dejës sekuestroi dhe shkatërroi 175 bimë narkotike.
Policia bën me dije se vijon puna për identifikimin dhe ndalimin e autorëve të përfshirë në kultivimin e kanabisit, ndërsa operacioni “Koordinata” do të shtrihet në të gjithë territorin e qarkut Shkodër.
Autoritetet theksojnë angazhimin e tyre për të ndëshkuar çdo rast të kultivimit të paligjshëm të lëndëve narkotike dhe çdo akt neglizhence apo bashkëpunimi nga zyrtarë lokalë.
/vizionplus.tv
