Pamundësia e administratës fiskale për të monitoruar dhe verifikuar tregun, mbi çmimet që ofrohen, detyron qeverinë që të vendosë çmime referencë. Këto të fundit janë një praktikë ku qeveria përcakton një çmim dysheme nën të cilën nuk do të lejohen deklarimet, për efekt taksash dhe tatimesh.
Flobens Dilaveri ekspert ekonomie, gjatë një intervistë në emisionin E-ZONE tha se qeveria ka dështuar me format e korrekte tatimore, për të formalizuar tregun, ndaj vendos referenca.
“Përcaktimi i një çmimi referencë nga ana e qeverisë është dëshmi se ka dështuar administrata fiskale. Kjo është një metodë arbitrare dhe tregon paaftësinë e qeverisë për të monitoruar tregun. Teksa ne po kërkojmë çdo ditë e me më shumë heqjen e tyre në doganë, qeveria po kërkon ti vendosë në turizëm. Referencat janë hallka e fundit që duhet të përdoren për të mbledhur më shumë para në buxhet”, u shpreh Flobens Dilaveri, ish-nëndrejtor i tatimeve në emisionin E-ZONE
