Një grup kriminal me rrezikshmëri të lartë shoqërore është goditur nga policia e Vlorës, ndërsa janë arrestuar drejtuesi dhe anëtarët.
Grupi që vepronte në Vlorë e Fier është goditur mbrëmjen e së hënës në fshatin Vranisht, ku siç duket nga pamjet policia rrethon lokalin ku ndodheshin 6 anëtarë të grupit, dhe I arreston në flagrancë.
Mes të arrestuarve është edhe Turi Aligjoni 55 vjeç, autor i plagosjes me armë zjarri të 27-vjeçarit Kevi Lazaj, ngjarje e ndodhur 2 ditë më parë në Çole të Vlorës.
Ilir Dula ose Aleksandër Dula ka rënë në pranga po ashtu , teksa rezulton i shpallur në kërkim ndërkombëtar, nga Italia, pasi Gjykata e Apelit Leçe, në 2024, e ka dënuar me 6 vjet e 8 muaj burgim, për veprat penale “Trafikimi i lëndëve narkotike” dhe “Pjesëmarrja në organizatë kriminale”, me qëllim trafikimin e lëndëve narkotike.
Grupi ushtronte aktivitet kriminal në fushën e krimeve kundër personit dhe në fushën e narkotikëve.
Gjatë operacionit u sekuestruan 4 armë zjarri pistoleta të markave “Glock”, “Sig Sauer” dhe “Canik”, municion luftarak, 7 celularë, 1850 euro dhe 3 automjete (2 prej tyre, me targa të huaja dhe njëri prej tyre, i blinduar.
Nga hetimet rezultoi se njëri nga automjetet e sekuestruara, tip “BMW X5”, ishte përdorur nga Turi Aligjoni për t’u larguar nga vendi i ngjarjes, pas plagosjes së dy ditëve më parë.
