Një 19-vjeçar i identifikuar si Rigers Sylaj është vënë në pranga pasi plagosi aksidentalisht me armë zjarri shokun e tij 17-vjeçar. Në pranga kanë rënë edhe dy të tjerë, të cilët dyshohet se kanë penguar zbardhjen e ngjarjes.
Nga hetimet paraprake rezulton se ngjarja ka ndodhur në banesën e 19 vjeçarit. Ky i fundit, duke i treguar armën e zjarrit pistoletë shokut të tij dhe duke menduar se arma nuk kishte fishek në fole, e ka shkrepur aksidentalisht, duke plagosur 17-vjeçarin.
Gjithashtu, policia sekuestroi armën e zjarrit pistoletë që 19-vjeçari posedonte pa leje. 17-vjeçari i plagosur ndodhet në spital, nën kujdesin e mjekëve, ndërsa hetimet vijojnë për zbardhjen e plotë të ngjarjes.
Njoftimi i policisë:
Rreth orës 01:40, pas njoftimit se në rrugën “Berit Beker” ishte plagosur me armë zjarri një 17-vjeçar, shërbimet e Sektorit për Hetimin e Krimeve të Rënda kanë shkuar menjëherë në vendngjarje, me qëllim sqarimin e rrethanave dhe dokumentimin e plotë ligjor të rastit.
Nga veprimet e para hetimore rezulton se në banesën e shtetasit R. S., 19 vjeç, ky i fundit, duke i treguar armën e zjarrit pistoletë shokut të tij dhe duke menduar se nuk kishte fishek në fole, e ka shkrepur aksidentalisht dhe për pasojë është plagosur 17-vjeçari.
Në përfundim të veprimeve të para hetimore:
-u bë arrestimi në flagrancë i shtetasit R. S., 19 vjeç, për veprat penale “Plagosja e rëndë nga pakujdesia”, “Veprime që pengojnë zbulimin e së vërtetës” dhe “Mbajtja pa leje e armëve dhe municionit luftarak”;
-u arrestuan shtetasit A. V., 20 vjeç dhe H. H., 22 vjeç, për veprën penale “Veprime që pengojnë zbulimin e së vërtetës”.
17-vjeçari ndodhet në spital, nën kujdesin e mjekëve.
Vijojnë hetimet për dokumentimin e plotë të rastit dhe sqarimin e të gjitha rrethanave të ngjarjes.
Materialet procedurale i kaluan Prokurorisë, për veprime të mëtejshme.
