Detyrimi për të mbajtur maska për të gjithë qytetarët edhe në ambiente të hapura ka ndarë në dy kampe edhe bluzat e bardha. Mjeku Petrit Vargu i cilëson këto masa si të panevojshme duke thene se nuk beson se do te japin rezultat.
“Me këto masat e maskës nëpër rrugë është vetëm një bufalatë e qeverisë që nuk do të japë rezultat. Meqenëse ne nuk kemi studime, meqenëse nuk kemi Komitet Ekspertësh, atëherë e vetmja gjë që na mbetet është të kopjojmë botën. Është një masë që nuk i përshatet kushteve të vendit tonë. Për mendimin tim, është një kopjim i keq që nuk do të zgjidhë asgjë në vendin tonë, përkundrazi do të acarojë. Nëse nuk do të marrësh koronavirusin, dil tek sheshi kryesor i qytetit dhe asgjë nuk të gjen. Qeveria fali gjobat për të gjitha thyerjet e pandemisë. Kështu që njerëzit në subkoshiencën e tyre thonë që pse duhet të mbajmë maskën, do të na i falin edhe një herë tjetër.”
Ndërsa mjeku infeksionist Gentian Stroni i sheh si të vonuara këto masat.
“Kjo masë është disi e vonuar pasi të gjitha shtetet e tjera që kanë patur problematikat e njëjta me ne, madje kohë përpara e kanë vënë këtë lloj mase qysh në valën e parë të COVID. Po t’i shikosh, duke filluar nga Italia, Spanja, Franca, të gjitha këto kanë qenë shtete që prej kësaj mase kanë patur benefite.”
Ndërkohë detyrimi i mbajtjes së maskave do të ketë edhe kosto për familjet.
“Këtu në vendin tonë, në kushtet e një varfërie është një gjë që do të varfërojë më tepër ose do të jetë problem për buxhetin familjar.”
Vendimi pritet të hyjë në fuqi të enjtën e 15 tetorit, ndërsa për shkelësit policia e shtetit dhe ajo bashkiake do të vendosë gjoba.