Një grup alpinistësh kanë pushtuar majën e “Faqekuqit” në malin e Ostrovicës, në një lartësi prej 2330 metra.
Në përbërje të këtij grupi kanë qënë 13 alpinistë me udhëheqës ngjitjeje Gjergji Bojaxhi dhe vetëm 9 prej tyre kanë arritur në lartësinë 2330 metra.
Grupi prej 13 alpinistësh ka filluar lëvizjen nga fshati Shtyllë për të vijuar më pas rrugëtimin drejt Ostrovicës, ngjitje e cila ka kërkuar afro 6 orë.
Ngjitja e Ostrovicës është një nga ngjitjet më të vështira dimërore për shkak të trashësisë së borës që vende vende shkon deri në 2 metra por edhe për shkak të vështirësisë të lëvizjes.
Ostrovica gjithnjë ka qënë dhe mbetet shkalla më e lartë e ngjitjes së një maje, ndaj dhe për këtë alpinistët për të shkuar deri në majë kanë qënë të detyruar të përdorin teknikat e kërkuara për ngjitje të kësaj vështirësie.
Duhet thënë se maja e “faqekuqit” në Ostrovicë në të dy programet e saj atë të ngjitjes shkëmbore por edhe të ngjitjes dimërore mbetet një prej majave të kërkuara nga alpinistët shqiptarë.
